Wania SiddiquiPakistan ki folk aur music traditions mein ese artists bohut kam milte hain jinhon ne apni aawaz se hi apne ilaqay, apni zaban aur apni tehzeeb ko eik nai recognition di. Mai Dhai un me se eik hain jo Tharparkar, Sindh ki Registan se emerge kar kay, Pakistan aur duniya bhar mein folk aur classical mooseeqi ka ambassador bani. Folk music aur saqafat kay manzarnama mein ese fankaar shamil hain jinhon ne apni zuban, apni pehchan aur apni saqafat ko suron kay zariye na sirf zinda rakha balkay usay nayi manzil tak le gaye.
Mai Dhai ka taluq Manganiar community se hai. Ye community Sindh aur Rajasthan kay desert ilaqon mein sadiyon se mooseeqi, dholak, harmonium aur daf kay zariye apni kahani bayan karti rahi hai. Un ki walida Khand Bai bhi eik folk singer thein aur Mai Dhai ne bachpan mein un ki mehfilon mein shamil hokar sur aur gaanay ki taleem hasil ki. Unhon ne apni pehchaan saqafat kay us dour kay hissa kay tor par banai jahan gaane sirf rojhaan nahi balkay yaad-o-gum, shauq, rasm-o-rivaj aur tehzeeb ka izhar thay. Mai Dhai ne apne career ki shuruat shadi, local gatherings aur mukhtalif events se ki. Manganiar riwayat kay mutabiq gaanay, dhol aur harmonium ki thaap kay saath hotay thay.
2013 mein Mai Dhai ne Lahooti Live Session mein hissa liya, jahan unhon ne “Mai Dhai Band” ko lead kiya. Un kay band mein eik harmonium player, Jamal Shab aur eik dhol player Muhammad Fakir shamil hein. Unhon ne 2015 mein US mein SXSW music festival mein perform kiya jahan se unhon ne kamyabi ki bulandiyo ko chhuwa aur maqbool hogaein. 2015 mein hi unhon ne Coke Studio Pakistan Season 8 mein Atif Aslam kay saath “Aankharli Pharookai” aur “Kadi Ao Ni” perform kiya jis ne social media platforms par millions of views hit kiye. Ye bhi un kay career kay liye eik turning point bana, tamaam rural aur urban barriers ko torne ka aur woh duniya bhar mein pehchane jane lagein. 2024 mein duniya ne un ko phir Time Square, New York kay digital billboard par feature hotay dekha jo eik regional artist kay liye bht bari achievement hai aur is tarah un ki international recognition aur strong hogai.
Mai Dhai ka music simple lok-fusion se shuru hota hai. Un kay tracks mein Sindhi, Marwari aur Dhatki zubanon me songs shamil hein jis mein dholak, harmonium, aur khartal ka traditional rang moujood hai. Un ki aawaz mein sirf dhol aur harmonium nahin balkay Tharparkar kay logon ka dard, un ki khushi, un ki Riwayat aur virsa sab mehsoos hota hai. Un kay famous tracks mein “Laari,” “Maan Ji Maourri Jaya,” aur “Berayyo” shamil hein. Un ka paighaam sirf entertainment nahi balkay identity, pride aur cultural preservation ka hai. Mai Dhai ne 2016 mein “Latif award”, 2017 mein un ko Best Playback Singer hone par “Nigar Award” aur 2024 mein President of Pakistan ki janib se “Pride of Performance Award” se nawaza gaya.
Jab digital platforms ne mooseeqi ko global banaya, to Mai Dhai ka fun bhi us me shamil howa. Pakistan ka regional music app, Koyal ne un kay 20+ tracks record kar k dunya se share kiye jise ab global audiences stream kar sakti hai. Agar aap ne abhi tak Mai Dhai kay gaanay nahi sune, tou abhi Koyal App download karein aur diye gaye link par click karein
