Wania SiddiquiPakistan ki music industry mein bohut kam log asal jazbaat aur qabil-e-ghaur aawaz kay sath apna maqam banate hain. Amanat Ali unhi mein se eik hain. Unkay tracks unhein Pakistan ka eik maqbool aur talented singer banate hain. Apni soulful aawaz aur zabardast vocal range ki wajah se unhon ne awaam kay dil jeet liye hain. Chahay woh classical kalam ho ya modern songs, Amanat Ali har andaaz mein apna jaduu dikhate hain. Amanat Ali, Pakistan music industry ka eik esa naam hain jo na sirf Pakistan mein balkay sarhad paar bhi apna talent dikha chukay hein.
Amanat Ali 10th October 1987 ko Faisalabad mein paida howe. Chooti umar se hi unka lagao music se tha. Woh mashhoor folk aur ghazal singer Nazakat Ali kay betay hein. Amanat Ali jab sirf 6 saal kay thay, tou unkay walid ne unko music ki taleem dena shuru kar di. Sirf walid hi nahi, balkeh unkay chacha Hassan Sadiq, jo eik international Noha Khuwan hain, ne bhi unhein Noha khuwani aur classical music ki training di. Amanat Ali ka ta’alluq Sham Churasi family se hai, jo Pakistan ki sabse purani aur legendary music families mein shumar hoti hai. Yehi wo family hai jahan se unko music ka zauk aur riwayat virasat mein mili. Amanat Ali apni family ki music legacy ko bohot grace kay sath aage barha rahe hain.
Amanat Ali ne mukhtalif genres Qawwali, Ghazal, aur modern Pakistani music mein kaam kiya aur dikhaya kay versatility bhi artist ki power hai. Unhone 16 years ki age mein apne school mein music program arrange kiya. Amanat Ali ne 2006 mein apna music career professionally start kiya. Unhon ne Mikal Hassan’s band kay saath as a lead musician perform kiya. 2007 mein unhon ne Indian singing show ‘Sa Re Ga Ma Pa’ mein participate kiya aur third position hasil ki. Is show se Amanat Ali kay liye music career mein mazeed opportunities khulein aur namwar artists kay saath kaam krne ka mauqa mila.
Unkay mashhoor tracks jinhein sun kar log unkay talent kay fan ho gaye, unmein “Bahut Din Ho Gaye”, “Tera pyar”, “Saadgi” aur “Pardesia” shamil hein. 2013 mein unka gaana “Kuri Yes Aye, Munda Set Aye” Pakistani film “Zinda Bhaag” mein feature howa. Is kay ilawah unkay mashhoor Nohay “Lay Chalay Qaidi Bana Kar Shaam Ko”, “Bekason Ke Madadgaar”, “Naatawa’n Sajjad Ha” shamil hein. 2008 mein unka pehla international tour howa jahan unhon ne Richa Sharma, Kailash Khair aur Atif Aslam kay sath perform kiya. 2008-2009 kay darmiyan unkay solo tours USA aur Canada mein howe. Woh UAE, Norway aur India mein bhi equally popular hain. Unhon ne apne singing career kay saath saath Pakistan Music Show “Voice of Pakistan” mein judge ki duty bhi a’ada ki. Iskay ilawah bohot se TV dramas kay soundtracks bhi unki aawaz mein moujood hain, jin mein “Dil Ko Manaana Aya Nahin”, “Raaju Rocket”, “Ishq Sumandar” aur “Sham” shamil hain.
Aaj jab digital platforms ne music sunne ka tareeqa badal diya hai, tou Koyal par Amanat Ali kay tracks sunna eik anokha tajurba hai. Yahan unkay classical numbers, soulful Ghazals aur modern hits sab hi available hain jo unki versatility aur musical journey ka saboot hain. Koyal App par unkay songs, Noha aur Kalam ki 70+ tracks ki collection sunne kay liye Koyal App download karein aur diye gaye link par click karein.
