Wania SiddiquiNusrat Fateh Ali Khan, jinhain duniya “Shehenshah-e-Qawwali” kay naam se jaanti hai, Pakistan ki saqafati pehchan ka woh roshan chapter hain jinhon ne qawwali ko sirf zinda nahi rakha balkay isay eik global genre ki shakal bhi di. Riwayati kalam ho ya sufi rang, classical gayaki ho ya fusion music, Nusrat Fateh Ali Khan ka andaaz aaj bhi duniya bhar mein eik misaal mana jata hai. Un ki aawaz ki gehraai, un ka lehja, aur un ki roohani qaabiliyat aaj bhi mooseeqi ki duniya par gehra asar rakhti hai.
Nusrat Fateh Ali Khan 13 October 1948 ko Lyallpur, Faisalabad mein paida howe. Aap eik mashhoor Qawwal gharane se talluq rakhte thay. Yeh gharana taqreeban 600 saal purana tasawwur kiya jata hai aur Indo-Pak ki saqafat mein is ka eham maqam reh chuka hai. Un kay walid Ustad Fateh Ali Khan aur chacha Ustad Mubarak Ali Khan apne dor kay naamwar Qawwal thay. Un ki rehbari mein hi Nusrat ne saaz, sur, taal aur Qawwali ki rooh se mulaqat ki. Pehli dafa jab NFAK kay andar is fun ki rooh jagi toh woh sirf 9 saal kay thay. 1970s aur 1980s un kay fun ka chamakta dor tha. Unhon ne 1971 mein first public performance di jisse un ko pori duniya mein pehchaan mili. Woh ziada tar Punjabi aur Urdu mein hi gattay thay lekin woh khaas mouqoon par Persian, Braj Bhasha aur Hindi mein bhi perform krtay thay. Un kay first major hits mein Punjabi Qawwali “Ni Main Jana Jogi De Naal” shamil hai jis ko unhon ne 1971 mein compose kiya aur pehli dfa live perform kiya. Ye Kalam 17th century kay Sufi poet Bulleh Shah ki tehreer hai. Nusrat Fateh Ali Khan ne riwayati Qawwali ko modern rang diya aur international stage par isse eik naya maqam dila diya.
Un ki shoharat ka asli dor shuru howa jab unhon ne apne Qawwal party kay saath classical Sufi Qawwali, Hamd, Naat, Manqabat, aur Ghazal jaise mukhtalif genres ko eik naya andaaz diya. “Kali Kali Zulfon”, “Dam Mast Qalandar,” “Dulhe Ka Sehra,” “Yeh Jo Halka Halka Suroor Hai” aur “Noor E Khuda” yeh sab un kay timeless kalam ki misalein hain. Nusrat Fateh Ali Khan woh pehle Pakistani artist thay jinhon ne global music industry mein apna eik alag muqaam banaya. Bollywood se Hollywood tak, Europe se Africa tak, un ki aawaz ne har zehan ko apni taraf kheencha. Un kay track “Dead Man Walking,” “The Last Temptation of Christ,” aur kai doosri tracks Hollywood films ka hissa rahay hein. Western audience ne pehli dafa Nusrat ki aawaz mein music ki gehraai aur spirituality ko jis andaaz se mehsoos kiya, woh world music kay liye eik turning point tha.
NFAK ko music industry mein ki gai khidmaat par 1987 mein President of Pakistan ki janib se “Pride of Performance Award” se nawazah gaya. Is kay ilawah un ko 1995 mein “UNESCO Music Prize”, 1998 mein “PTV Life Time Achievement Award” paish kiya gaya. Sab se ziadah Qawwali albums release krne kay aizaz mein 2001 mein Nusrat Fateh Ali Khan ka naam “Guinness Book of World Records” mein shamil kiya gaya. Un ki awaaz, un ka andaaz, aur un ka jazba aaj bhi sun’ne walon kay dil-o-deemagh par chhaya howa hai. Un ka laqab “Shahanshah-e-Qawwali” un ki music industry especially Qawwali kay liye ki gai khidmaat ka saboot hai. Un ka asar Bollywood, Western music, world-music festivals aur digital platforms tak mehsoos howa.
Nusrat Fateh Ali Khan shadeed alalat kay bais 16 August 1997 ko 48 saal ki umar mein is fani duniya se rukhsat ho gaye. Un kay intiqal kay baad bhi un ki awaaz aur un ka asar zinda hai. Har saal un kay fans, musicians aur cultural institutes un ko yaad karte hain. Un ki wafaat ne music world ko eik bohat bara saniha diya. Lekin un ki recordings, live mehfilain aur riwayati kalaam aaj bhi saqafat ki rooh ko zinda rakhe howe hain. Pakistan main Koyal App jaise regional-music platforms ne un ki recordings ko preserve aur promote karne ka kaam kiya hai jahan un ki legacy younger listeners tak bhi pohonch rahi hai. Koyal par Nusrat Fateh Ali Khan kay 450+ tracks moujood hein. Agar aap NFAK ko sunna chahtay hein tou abhi Koyal App download karein aur diye gaye link par click karein
