Wania SiddiquiSindh ki hawaoon, zameen aur lok saqafat ki khushboo mein agar koi aawaz sab se gehri, sab se asar angez aur sab se lambay arsay k liay zinda rehne wali hai, tou woh aawaz Fozia Soomro ki hai. Unhon ne apni zindagi mein sirf gaanay nahi gaaye, balkay eik esi tehreek ka aaghaz kiya jo Sindh aur Tharparkar ki lok saqafat ka hamesha kay liye hissa ban gayi.
Fozia Soomro ka asal naam Hakeema tha. Fozia Soomro 1966 mein Tharparkar, Sindh mein paida huien. Fozia Soomro ka taluq eik aam khandan se tha, lekin un ki awaaz ne unhein na sirf Sindh balkay poore Pakistan mein mashhoor kar diya. Un ka bachpan Sindh kay eik shehar Tando Muhammad Khan mein guzra. Un kay walid, Haji Nathoo Soomro bhi eik singer thay. Fozia ko choti age se hi gaanay ka shauq tha lekin un ki conservative family background ki wajah se unhein bohat si mushkilaat ka samna karna para. Sirf 16 saal ki age mein, Fozia ne Radio Pakistan, Hyderabad kay zariye apne career ka aaghaz kiya jab unhein Naseer Mirza ne record karne ka mauqa diya. Un kay pehlay doo gaanay “Be qadra qadr na kayaee ko” aur “Chade wai chade wai sathi sukhan ja” thay. Un kay ye gaanay release hote hi hit howe aur woh maqbool hone lgein.
Fozia Soomro ki aawaz mein watan ki mitti sa jaadu tha, un kay kalam mein dukh aur sukoon dono ka rang tha, aur un ki gaanon ne un logon ko bhi aawaz di jo samaj kay haathon khamosh thay. Fozia Soomro ka asar Sindhi saqafat par gehra tha. Unhon ne folk music ko promote karne mein eham hissah aada kiya. Unhon ne apne gaanon kay zariye Sindh kay logon kay jazbat aur masail ko bayaan kiya, jo un ki aawaz ko aur bhi behtar bana dete the. Fozia ke gaanay sirf mahool mein nahi balki logon ki zindagi mein sukoon aur tasalli ka zariya the. Unki awaaz ka jadoo aaj bhi logon ke dilon mein zinda hai.
Fozia Soomro ne apne career ke dauran kai mashhoor gaanay gaye, jismein “Tuke Wisaran Lai Jani,” “Akhriyoun Main Lurk Jani,” aur “Aj Had Ki Waro War” shamil hain. Unhon ne apne gaanon ke zariye aam logon ke jazbat ko bayaan kiya, jo unhein unke sunne walon se jora karte the. Fozia ne na sirf local poets ki shayari ko apne gaanon mein shamil kiya balkay Sindh folk culture ko barhawa dene ka zariya bhi banaya. Fozia Soomro ne apni zindagi mein kai inaam haasil kiye, jin mein “Shah Latif Award” bhi shamil hai. Fozia Soomro 4 September 2002 ko kidney failure ki wajah se is duniya se rukhsat huien. Un ki fans aaj bhi un kay gaanay sun kay unhein yaad karte hain. Un ka kaam aur un ki aawaz hamesha logon kay dilon mein zinda rahegi.
Fozia Soomro ki virasat aaj bhi un kay gaanon kay zariye jari hai. Un ki zindagi ka asal maqsad logon ko sukoon dena tha, aur unhon ne is maqsad ko haqiqat mein tabdeel kiya. Koyal App jo kay Pakistan ka sab se bara regional music platform hai, usne Fozia Soomro kay 1200+ tracks ko preserve kiya hai. Fozia Soomro ki aawaz Sindhi lok saqafat ka eik numaeinda pehlu thi. Un ki wafa’at eik cultural loss thi, khaas taur par un logon kay liye jo lok saqafat se mohabbat karte hein. Aaj bhi har saal un ki barsi kay din Sindh kay mukhtalif ilaaqon mein un kay ganay bajaye jaate hain aur unhein yaad kiya jata hai.
Koyal App par aap Fozia Soomro kay mashhoor kalam sun sakte hain. Abhi sunne kay liye Koyal App download karein aur diye gaye link par click karein:
