Wania SiddiquiBalochistan ka mashhoor folk singer Akhtar Chanal Zehri un funkaaron mein se hain jo apni aawaz aur traditional Music kay zariye sirf Balochi saqaafat ko zinda nahi rakhte, balkay us ko poori duniya mein pehchaan dilate hain.
Akhtar Chanal Zahri 1954 mein Khuzdar, Balochistan mein paida howe. Un ka taluq Zahri qabeelay se hai, jo Balochistan ki riwayati qaumiyat ka hissa hai. Unhon ne apni pehli taleem Mastung mein hasil ki, aur 1964 se music ki riwayati taleem hasil karna shuru ki. 1973 mein unhein Pakistan Broadcasting Corporation (PBC) kay Balochi Radio Station kay zariye pehchana gaya. Issi saal unhon ne pehli ghazal ya folk recording bhi ki aur 1974 mein nationwide famous song “Deer Deer” release kiya jo aatay saath hi maqbool hogya, jisse un ki shohrat barh gayi aur wo Balochistan kay chhotay gaon se le kar poore mulk mein eik pehchaan ban gaye.
Akhtar Chanal Zahri ka turning point tab aaya jab unhon ne Coke Studio Pakistan mein perform kiya. Unhon ne Season 4 mein “Nar Bait” aur “Daanah Pah Daanah” jaise tracks perform kiye. Phir Season 7 mein gaana “Washmallay” bhi perform kiya, jo un ki folk aur contemporary style ka fusion hai. Akhtar Chanal Zahri ne Bollywood mein bhi apna kirdar aada kiya hai. Unhon ne 2015 ki film Phantom mein “Afghan Jalebi” (Dumbek Version) gaakar Bollywood mein entry ki. Us kay ilawah, unhon ne 2016 mein film “Mirzya” mein bhi nazar aaye, jis mein unhon ne Saieen Zahoor aur Nooran Sisters kay saath perform kiya. Akhtar Chanal Zahri ki riwayati aawaz aur melodic texture ne un ko global taur par bhi pehchaan di. Unhon ne Shanghai Cooperation Organisation (SCO) jaise summits mein perform kiya, jo un ki international importance ka saboot hai.
Akhtar Chanal Zahri kay kuch bohat mashhoor tracks un ki folk identity ka hissa hain, jin mein “Jhalawan,” “Daanah Pah Daanah,” “Makro Fareb Na Duniya,” aur “Mumal” shamil hein. Un ko un ki qaumi aur saqafti khidmaat par 1998 mein “Pride of Performance Award” se nawazah gaya, jo Pakistan ka eham civil award hai. Un ko is kay ilawah bhi national aur international level par awards mil chukay hein. Un ko duniya bhar mein perform karne ki wajah se cultural ambassador ki haisiyat bhi di jati hai. Un ki surili aawaz aur folk rhythms Balochi zubaan aur mehsoosaat ki jhalak deti hain.
Aaj bhi Akhtar Chanal Zahri ki riwayati aawaz new generation mein apni jagah bana rahi hai. Akhtar Chanal Zahri sirf eik funkaar nahi balkay Balochistan ki zameeni riwayat ki eik zinda rooh hai. Agar apne abhi tak Akhtar Chanal Zahri kay tracks nhi sunne tou abhi Koyal App download karein aur diye gaye link par click karein
