Wania SiddiquiNaat-e-Rasool ﷺ woh paak aur roohani kalam hai jo mo’min ki zindagi mein ishq-e-Rasool ﷺ ka naya rang bhar deti hai. Aisi hi eik rooh parwar aur dil ko chhu lenay wali Naat hai “Paigham Saba Lai Hai”, jisse mukhtalif mashhoor Naat Khuwan ne apni aawaz mein pesh kiya hai. Khususi taur par Farhan Ali Qadri aur Syed Muhammad Abdullah Shah ki roohani aawazon ne is kalam ko eik amar tasur bakhsha hai. Dono Naat Khuwan ka lehja, jazba aur adaegi is Kalam ko aur bhi dilkash bana dete hain.
Kalam ka aaghaz hi eik roohani paigham deta hai:
Paigham Saba Layi Hai Ghulzar-E-Nabi (SAW) Se
Aya Hai Bulawa Mujhe Darbar-E-Nabi Se
Ye misray eik mo’min ki sabse bari aarzu, Nabi Kareem ﷺ kay darbar kay bulaway ka izhar karte hain. Musalman kay liye yeh bulawa zindagi ka asal maqsad samjha jata hai. Kalam ka agla hissa mo’min ki duaon aur aansuon ki qeemat ko samjhata hai:
Har Aah Gayi Arsh Pe Ye Aah Ki Qismat
Har Ashq Pe Eik Khuld Hai Har Ashq Ki Qeemat
Tohfa Ye Mila Hai Mujhe Sarkar-E-Nabi Se
Aya Hai Bulawa Mujhe Darbar-E-Nabi Se
Ye alfaaz is baat ko wazeh karte hain kay Nabi ﷺ kay Dar par giraye gaye aansun, Allah kay arsh tak pohanch kar maqbool hote hain aur ye kissi tohfay aur Taufeeq se kam nhi. Safar-e-Madina sirf eik safar nahi, balkay eik ibadat hai jo mo’min ko duniya aur akhirat dono mein izzat aur nija’at ata karta hai. Har mo’min ki sabse bari khuwahish yeh hoti hai kay usay akhirat mein Nabi Kareem ﷺ ki shafa’at naseeb ho. Kalam mein bhi yeh jazbaat gehrai se bayan kiye gaye hain:
Labwahe Aankhe Band Hai Phaili Hai Jholiyan
Kitne Maze Ki Bheekh Tere Paak Dar Ki Hai
Yeh misray Nabi ﷺ kay dar se mangne ki izzat aur roohani sukoon kay lutf ka izhar karte hain. Naat Khuwan ka andaaz sun’nay walay ko yeh ehsaas dilata hai kay asal zindagi ka safar Madina tak ka safar hai. Unki aawaz mein jo sukoon hai, woh sun’nay walay ko Madina ki galiyon mein le jata hai. “Paigham Saba Lai Hai” sirf eik Naat nahi, balkay eik paigham hai. Har misra eik mo’min ki dua, aarzu aur akhirat ki umeed ko zinda karta hai.
Ye Naat har sun’nay walay kay liye eik roohani safar hai, eik dua hai aur eik umeed hai. Kalam kay alfaaz Madina ka bulawa aur Nabi ﷺ ki shafa’at ka paigham hain. Koyal App download karein aur “Paigham Saba Lai Hai” ko Farhan Ali Qadri aur Syed Muhammad Abdullah Shah ki aawaz mein sunne kay liye diye gae links par click karein.
