Wania SiddiquiSufi silsilon ki tareekh mein Hazrat Khawaja Ghulam Farid (R.A.) ka naam roohaniyat, ishq-e-haqeeqi se munsalik Punjabi aur Saraiki zubanon mein sufi shayari ki wajah se eik azeem maqam rakhta hai. Har saal unka Urs pooray jazbay, aqeedat aur roohani josh-o-kharosh kay saath manaya jata hai. Yeh Urs sirf eik mazhabi rasam nahi, balkay unki taleemat aur roohani paigham ko yaad karne ka zariya hai.
Saraiki zaban kay Sufi shair, Chishti-Nizami Sufi aur Sajjada nashin (Patron saint) Hazrat Khawaja Ghulam Farid (R.A.) 1845 mein Kot Mithan kay maqam par paida howe. Aap kay walid ka naam Khuwaja Khuda Bakhsh tha. 5 saal ki omer mein aapki walida dunya se parda farma gayein aur aap jab 12 saal kay howe tou aapkay walid sahab bhi dunya se rukhsat hogaye. Aapne apne baray bhai Fakhr Jahan Uhdi se taleem hasil ki. Aap is zamany kay aalim thei aur aapne kai kitabein bhi likhein. Hazrat Ghulam Fareed Saraiki, Arbi, Farsi, Urdu, Sindhi, Punjabi aur Braj Bhasha zaban jante thay. Aap Saraiki or Urdu kay behtareen shair thay. Unhon ne Sindhi, Farsi or Braj Bhasha mein bhi kuch nazmein likhein. Unkay kalam ka markazi paigham ishq-e-Rasool (SAW), mohabbat-e-insaniyat aur ibadat-e-haq hai.
Hazrat Khawaja Ghulam Farid (R.A.) ne apni zindagi kay har lamhay mein faqri zindagi guzari, aur unkay kalam insaniyat kay liye roshni ka charagh ban gaya. Un ki wirasat saqafti or a’almi shanakht ko mutasir karti hai. Raheem Yaar Khan mein Khawaja Fareed University of Engineering and Information Technology kay naam par university qaim hai aur hukumat-e-Pakistan har saal literature mein “Khawaja Ghulam Farid Award” se nawazti hai. Iskay ilawah Pakistan post ne 2001 mein un kay aizaz mein eik commemorative stamp jari ki thi.
Khawaja Ghulam Farid (R.A.) ka Urs har saal Dera Ghazi Khan Division, Punjab mein manaya jata hai. Is mauqay par mehfil-e-sama aur qawwaliyon ka ehtimam hota hai, jahan unkay kalam ko Naat Khuwan, Qawwals aur shair apni aawazon mein pesh karte hain. Is saal bhi unka 128th Urs shaan-o-shaukat aur adab kay saath manaya jarha hai. Hazaron mureed aur aqeedat mand unkay mazar par haazir howe, Fatiha di gayi, mehfil-e-sama hui aur unkay kalam ki roohani goonj ne har dil ko roshan kar diya.
Unkay mashhoor Kalam mein “Lag Gai Prit Te Bhul Gai Sari Zat Sifat Di Ho”, Persian nazam “Manāqib-i maḥbūbiyya” aur “Fawāʾid-i Farīdiyya” shaamil hain. Hazrat Khawaja Ghulam Farid (R.A.) ka kalam insaan ko sirf lafzon ka paigham nahi deta balkay uskay andar Allah aur Rasool (SAW) ki mohabbat ko mazboot banata hai. Khawaja Ghulam Farid (R.A.) ka kalam humein yeh sabaq deta hai kay asli sukoon sirf Allah aur uskay Rasool (SAW) ki mohabbat mein hai. Duniwani sadmay, lalach aur dikhawa eik din khatam ho jata hai, magar ishq-e-haqeeqi hamesha zinda rehta hai. Unka paigham yeh bhi hai kay insaan ko insaaniyat ki khidmat karni chahiye. Jis tarah aap ne faqri zindagi guzari, waise hi murideen ko bhi dil ka saaf aur niyat ka pak hona sab se eham samajhna chahiye.
Ayazullah Mehdi ki aawaz mein Kalam “Khuwaja Ghulam Fareed Kot” ne jo andaaz ikhtiyar kiya hai, woh dilon ko aur gehra asar deta hai. Koyal par Ayazullah Mehdi ki aawaz mein “Khuwaja Ghulam Fareed Kot” moujood hai. Isse sun kar har shakhs bhi wohi roohani sukoon mehsoos kar sakta hai jo murideen Urs ki mehfil mein mehsoos karte hain.
Abhi Koyal App download karein aur Kalam “Khuwaja Ghulam Fareed Kot” sunne kay liye diye gaye link par click karein
